ألهموم / للشاعر سمير صبيح

الهموم
------------------
انه همومي جهال وترضع ادموع
اكضي اليل الولي وماينامون
اغفي ابهذا يكعد ذاك ويلوع
ويفزون اعلى صوته ماينامون
الكبر منهم فطمته وياكل اضلوع
شسوي اشلون لو كلهم يكبرون
جنح بيه انكسر والثاني مخلوع
وطرت كوه على اعناد اليكرهون
بس اسمك نهر والماي مكطوع
وانه اعلى الجرف الهث بلعيون
اون بسكوت موش ابصوت مسموع
وانه اجروحي علج والوادم اسنون
من عركه الفرح من روحي مشلوع
وشتل حزنه الزمان ابنص العيون
عشت عمري أبيتم ومكمط ابجوع
ورضعت الظيم من دون اليرضعون
ويمرني العيد وانه ابثوب مركوع
وعيديتي جرح عكس اليعيدون
تمنيت الوكت لو يرجع ارجوع
وانه امسودن وكولن يرجع الكون
بعده اخضر عشكنه وتوه مزروع
واجو ربعي امناجلهم يحصدون
يونس زين عمي ابحوت مبلوع
وانه ابحلك الشماته المايرحمون
------------------------

» ألجرش والجراشة والمجرشة / للشاعر عبود الكرخي ( رحمه ألله )
» زنجيل ياسماء شعراء الشطرة / الشاعر ميثم الخطاط
» ابوذية للشاعر سعدون المكصوصي
» القصيدة الكوثرية / للشاعر رضا الهندي
» حليب الأم / للشاعر ابو عمار الربيعي