الجرش والجراشة و المجرشه /الشاعر عبود الكرخي
---------------------------------------
ذَبيت روحـي عالجـرش وأدري الجـرش ياذيهـا
ساعـة وأكسـر المجرشـة وألعـن أبـو راعيهـا.
****
ساعـة واكسـر المجرشـة وألعـن أبـو السواهـا
إشجم سفينـة بالبحـر يمشـي ابعكسهـا اهواهـا
إيصيـر أظلّـن ياخلكـك متجابلـة آنـه ويـاهـا
كلمـا يكيّرهـا النـذل آنــي بحيـلـي ابريـهـا
****
ساعة واكسر المجرشة واكصد أبـو الحملـة علـي
واطلب مـرادي وانتحـب بلجـي همومـي تنجلـي
نـار البكلبـي اسعـرت يهـل المـروّة وتصطلـي
ما شفت واحد ينتخـي مـن اهـل الرحـم يطفيهـا.
****
ساعة واكسر المجرشة وألعـن أبـو اليجـرش بعـد
حظـي يهـل ودّي نـزل والجايفـه حظهـا صعـد
سلّمت أمـري واسكتـت للـي وعدنـي ابهالوعـد
نصبـر علـى الدنيـه غصـب للّحـد وانباريهـا.
****
ساعة واكسر المجرشه واشغـر أنـا لسابـع سمـه
وادعي على الجان السبـب أمـي وأبـوي بالعمـه
أم كَشره وام بوز الجلب جي يرضـه ربـي امنعمّـه
كعدّهـا بأعلـى مرتبـه وجـوخ وزري يجسيهـا.
****
ساعة واكسر المجرشه وألعن أبـو راعـي الجـرش
كعدت يـاداده أم البخـت خلخالهـا يـدوي ويـدش
وآني استادي لو زعل يمعش شعـر راسـي معـش
هم هـاي دنيـا وتنكضـي وحسـاب أكـو تاليهـا.
****
ساعة واكسـر المجرشـه والبـس لبـاس التنتنـه
جي فوكك درد الله، النذل استادي ضربنـي بميجنـه
بالهيمه عطشان الأسـد والهـوش معتـاش ابهنـه
هل مـال أبـو هـدلان للدجلـه شـرب صافيهـا.
****
ساعة واكسر المجرشه وانحر على النمسـا ومجـر
هنـاك أنكـر تبّـع وقحطـان والطائـي ومـضـر
ترضـه يالمسيّـر سفينـة نـوح يـا رب البـشـر
عبّيات ابو ها اكحيلـه واحضـان الجـرد يشبيهـا.
****
ساعة واكسر المجرشه واقسـم أنـا بـرب الفلـق
ويللي ابطن الحوت ابن متي النبـي يونـس نطـق
كلّـه كتبتـه بالـورق عنـدي فـقـط إلا الـزلـق
مـا قيدتهـا بدفتـري اوغيـري فــلا قاريـهـا.
****
ساعة واكسر المجرشة واكطـع مـن الدنيـا الأمـل
للجرش مـا أرجـع بعـد إلا بابـره يخـش جمـل
كل يوم ناصبلي عـزه استـادي النغـل مـا الثـوَل
عقلي انذهل جسمي نحـل روحـي السكـم لافيهـا.
****
ساعة واكسـر المجرشـة واصعـد برجلـي للفلـك
واوصـل السابـع سمـا وبيـدي ألزمـه للمـلَـك
من يوم أمص جمعي، الدهر لاحكك على عمري وكللك
يعبّـر علـيّ. كـل وكــت للملعـنـه يجزيـهـا.
****
ساعة واكسر المجرشه وانحر علـى أهـل الصيـره
وانشد على شيـوخ العـرب أهـل الشيـم والغيـره
يرضـى إلهـي بالـرفـاه العـبـده أم خنفـيـره
تخدمها حُرّه وكل وكـت كـاس الصبـر تسكيهـا.
****
ساعـة واكسـر المجرشـة وألعـن أبـو الكيّرهـا
واحركك أبو كـل مـن ابمنشـاره وفاسـه انجرهـا
بعنـاد هالظالـم استـا دي رويحـتـي مرمـرهـا
للكفـر يـا أهـل الرحـم إبـن الزنـه يقرّيـهـا.
****
ساعة واكسر المجرشه وألعـن أبـو اليكطـع مَهـر
طفله على شايب هـرم يفطـن علـى حفـر البحـر
وصلـه سختيانـه الوجـه واللحيـة تشبـه للأبـر
الله مـا يقـبـل هالبـشـع لرويحـتـي سابيـهـا
------------------------------------[center]
الأربعاء نوفمبر 02, 2011 3:52 am