((يزوّار الحسين وياكم اخذوني)) للشاعر يونس عواجي
---------------------------------------------
جيت أكتب قصيدة والگلب مكسور - من شلت القلم دمعاتي بعيوني
إجه وكت الزيارة وإسمي مو مكتوب - معقولة الأحبهم مايريدوني؟
أنه الخادم لخدّامك يبوالأحرار - يعني ويه الخدم لازم تكتبوني
مو منّه أمِنها المِنَّة لك مولاي - خدمتكم شرف وعليها ربّوني
بس اتعودت كل مرة يامولاي - اشما أطلب طلب بالحال تنطوني
يم راسك وگفت ابأربعين الفات - وطلبت ازيارتك وإلكم تعودوني
شما تقسى الظروف شما تزيد أخطار - اشما يحصل چتل واشما يمنعوني
أريد أتعنى ماشي الحظرتك يحسين - حافي وشايل اهمومي على امتوني
وأشرب بالمضايف (چاي أبوالسجاد) - وأحس بالجنّة گاعد من يضَيفوني
ماشي اشما أطب إلسيطرة مسرور - براحتكم أگلهم من يفتشوني
أنه شيعي الهوّية وجاي أزور احسين - أحييهم وهمّه النوب يحييوني
بدون ازيارتك ماريده عمري يطول - يبوالسجاد بالحسرة تخلوني!!
إذا ماانكتب زاير إلك هالعام - وحق الزهرة أهوَن لو يدفنوني
عاين حالتي من الصبح للّيل - من كثر البچه متورّمه اجفوني
گاعد واسمع الملّه جليل يگول - ((يزوّار الحسين وياكم اخذوني))
--------------------------------------------------
السبت فبراير 25, 2012 4:33 am